الەۋمەتتىك جەلىدە ءتىل جاناشىرى رۋزا بەيسەنبايتەگىنىڭ پسيحولوگيالىق ورتالىققا كۇشتەپ جاتقىزىلعانى تۋرالى اقپارات تاراعان ەدى. Qamshy.kz اقپارات اگەنتتىگى اتالعان اقپاراتتى ناقتىلاۋ ءۇشىن پاۆلودار وبلىسى دەنساۋلىق ساقتاۋ باسقارماسىنا حابارلاستى. باسقارمانىڭ باسپا ءسوز حاتشىسى بۇل اقپاراتتى راستاپ وتىر. 

"اقپاراتتى راستايمىز. ناۋقاس پاۆلودار وبلىستىق پسيحيكالىق دەنساۋلىق ورتالىعىنا 24 قاڭتار كۇنى ساعات 16.30-دا تۇسكەن. وزگە مالىمەتتەر “حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىنىڭ 273-بابىنىڭ نەگىزىندە جاريا ەتىلمەيدى. بۇل – دارىگەرلىك قۇپيا. ءقازىر سەبەبىن ايتاتىن بولساق ول كىسى ءبىزدى سوتقا بەرۋى مۇمكىن"، دەدى باسقارما وكىلى. 

رۋزا بەيسەنبايتەگىنىڭ اۋرۋحاناعا تۇسكەنى تۋرالى اقپاراتتى ابزال دوستيار حابارلاعان ەدى. 

"شۇعىل! ءتىل جاناشىرى، كۇرەسكەر انامىز اۋرۋحاناعا ءتۇستى! بۇگىن تۇستەن كەيىن رۋزا اپاي حابارلاسىپ: "ابزال بالام، مەن سوتقا كەتىپ بارا جاتىرمىن، ءبىر ءدامحانانىڭ يەسى ءتىل ماسەلەسىنە بايلانىستى سوتقا بەرىپتى، كەلگەن سوڭ حابارلاسامىن.  ءقازىر عانا بەلگىلى بولعانداي رۋزا بەيسەنبايتەگىن جەدەل-جاردەم كولىگىمەن الىپ كەتىپتى، الىپ كەتكەنگە دەيىن ول كىسىنى پوليسيا قىزمەتكەرلەرى قورشاپ تۇرعان ەكەن. سول ساتتەگى تىكەلەي ەفير ساقتالماپتى، اپايدىڭ وزىنە قوڭىراۋ شالسام، تەلەفونىن كوتەرمەي تۇر"، دەپ جازدى بەلسەندى ءوزىنىڭ فەيسبۋك پاراقشاسىنا. 

رۋزا بەيسەنبايتەگى كەرەكۋدەگى ءتىل جاناشىرى رەتىندە تانىمال. ول وبلىستاعى بىرنەشە جىلدان بەرى مەملەكەتتىك ءتىلدى مەنسىنبەيتىندەرمەن كۇرەسىپ كەلەدى.